02:33 م
الأحد 11 يونيو 2023
كتبت بهيرة فودة:
علقت الناقدة الفنية ماجدة خير الله على أثير في الساعات الماضية، بشأن رغبة الفنانة حلا شيحة العودة إلى الفن، بعد تكرار مسألة اعتزالها.
وقالت ماجدة خلال مداخلة هاتفية لبرنامج “قعدة ستات” الذي تقدمه مروة صبري على شاشة “القاهرة اليوم”: “رأيي أن غياب حلا شيحة أو وجودها لا يترك أثر، وإحنا بندي قيمة كبيرة جدا بالحديث عن وجودها أو اختفائها، هي فنانة محدودة الموهبة وفيه عشرات من الممثلين والفنانين الموهوبين بجد محتاجين إلى فرص، وافتقادها مش حاجة مهمة، وهناك فنانات سواء خريجي معهد أو لأ ولكن موهوبين جدا، وأخذوا فرص واثبتوا وجودهم”.
وأضافت ماجدة خير الله: “إحنا بنضيع وقت مع حد مش مهتم بالفن، مش مهتم بالمهنة، بل بالعكس وتسيئ إليها، بيخلي الناس تعتقد أن المهنة دي شغلانة كده يقدر يخش فيها ويطلع زي ما هو عايز”.
وتابعت ماجدة خير الله: “وجود حلا شيحة مع عادل إمام وشريف منير تفتكري هي اللي كانت موقفه الفيلم على رجله؟ لأ طبعا حتى في اللمبي، كانت عبلة كامل، هي حظها أنها كانت بتتواجد معها ناس هما اللي شايفين الحكاية، هي كانت مجرد بنت لطيفة شكلها حلو، خلاص الكلام ده من 15 سنة، لكن دلوقتي لم تعد البنت اللطيفة، في 15 مليون واحدة طلعوا بعد كده موهوبين وحلوين وسنهم مناسب، احنا ليه ماسكين في واحدة مش مهتمة بالشغلانة خالص”.
جدير بالذكر أن غياب الفنانة حلا شيحة عن الفن وابتعادها عن التمثيل تكرر أكثر من مرة، بينها مرات ارتدت فيها الحجاب والنقاب، ثم خلعتهما.
