11:09 ص
الجمعة 09 فبراير 2024
كشف المخرج عمرو سلامة، عن تعرضه لموقف صعب في مسلسل “طايع” جعله يفكر كثيرا في الاعتزال وهو وفاة المخرج المنفذ روبير طلعت.
وقال سلامة، ببرنامج “أسرار النجوم”: “أنا لحد دلوقتي مشفتش (طايع) من وقت ما خلصت تصويره لما بفتحه بفتكر حاجات حصلت، جالي صدمة نفسية كبيرة بعد وفاة المخرج المنفذ وصديقي روبير طلعت وقت التصوير، ده كان موقف خلاني أحس إني مش عايز أشتغل الشغلانة دي تاني، روبير طلعت توفي معايا وأنا بكلمه على التليفون”.
عمرو سلامة تابع: “كنا المفروض نسافر نصور بره وأنا مسافرتش، وهم راجعين كان لازم هو يستنى يوم زيادة، كلمني في يوم وكان صوته غريب وتعبان.. فضلت معاه على التليفون لمدة ساعة لحد ما الممرضة أخدت التليفون وقالت لي إنه توفى وأنا اضطريت أقول الخبر لأهله ولزوجته، وده كان قبل رمضان بـ4 أيام ولازم أكمل تصوير المسلسل ده وكله بسبب الضغط العصبي بتاع الشغل”.
وأوضح: “من وقتها متجاوزتش الصدمة ومش عايز أعمل أي مسلسل لرمضان، بعد المسلسل سافرت بره قعدت 12 يوم في كوريا أفكر أنا عايز أعمل إيه في حياتي، أنا والدي توفى قبل المسلسل على طول، وبعده دكتور أحمد خالد توفيق اللي بعتبره أبويا الروحي وكنت بصور ومقدرتش أحضر الجنازة وبعده المخرج المنفذ، المسلسل ده بالنسبة ليا فترة صعبة في حياتي”.
وأضاف: “في لحظات من كتر الضغط العصبي فركت في مهن تانية وبدأت أدرسها، سافرت بره ودرست تصميم الأحذية لأني بحب الجزم وبحس أن فيها فن، وفي فترة فكرت اشتغل مدرب كلاب”.
جدير بالذكر، أن مسلسل “طايع” عرض في رمضان 2018، وخاض بطولته عمرو يوسف، عمرو عبد الجليل، صبا مبارك، سهير المرشدي، أحمد عبد الله محمود، سلوى محمد علي، مي الغيطي، علي قاسم، تأليف محمد وخالد وشيرين دياب، وإخراج عمرو سلامة.
