11:09 م
الإثنين 17 يوليه 2023
كتب مروان الطيب:
كشف المنتج السينمائي أحمد الزواوي في مداخلة هاتفية ببرنامج “حضرة المواطن” تقديم الإعلامي سيد علي، عن لجوئه لعلم الفلك لإيذاء الفنانة فيفي عبده
وقال الزواوي: “في طرق احنا بنستعملها في حالة يبقي فيه حق لينا عند حد مش عارفين نجيبه بالقانون ولا بالأصول”.
واستكمل “والموضوع مالوش علاقة بالسحر بل الفلك ومش أي حد يقدر يعمل الكلام ده وحاولت أخد حقي بشتى الطرق ومعرفتش والنقابة معرفتش تجيب لي حقي حتى الوسطاء اللي تدخلوا معرفوش يجيبولي حقي وكان لازم ألجأ لحاجة بقى نسميها قرصة ودن”.
مضيفاً “في متخصصين بيعملوا الكلام ده وكان ليا فلوس دفعة تعاقد على بطولة فيلم كانت 60 ألف جنيه في 2017 وبعد محاولات حاولت أخد فلوسي منها بقيمتها النهاردة والمبلغ مش هيفرق معاها في حاجة لكن هي رافضة تدفعه”.
وانهى حديثه قائلا: “مكانش في حاجة بينا خلاص احنا حضرنا للفيلم ومضت وجبنا الأبطال اللي هي رشحتهم معاها وأول ما كنا هنبدأ تصوير وأكدنا عليها الأوردر وبعد ما حجزت لوكيشن ومعدات لقيناها ما بتردش خالص، وكلمت الدكتور أشرف زكي وقالي تعالي أعمل شكوي في النقابة ومعرفوش يجيبوها يحققوا معاها زي ما جابوني وحققوا معايا ورفعت قضية وكل شوية يتعملها حفظ عشان بتغير عنوانها كل شوية”.
