09:23 م
الإثنين 24 يوليه 2023
كتب مروان الطيب:
وجه الفنان الشاب خالد الفايد رسالة خاصة لمتابعيه وذلك عقب تراجعه عن قرار اعتزال الغناء خلال الساعات القليلة الماضية، ونشر عبر “فيسبوك” عدة رسائل لمتابعيه.
ونشر “الفايد” صورة له وعلق عليها قائلاً “حلو أوي انك تعمل الحاجة اللي بتحبها وتسيبك من كل القيود والأفكار الرجعية، أول يوم أنام مرتاح نفسياً وحاسس إني بعمل حاجة صح ولقيت نفسي وطردت الأفكار الهدامة من دماغي انتصرت على نفسي الحمد لله”.
وأعلن خالد الفايد قرار تراجعه عن اعتزال الغناء من خلال صورة قديمة مع المنتج هاني محروس وقام خلالها بالاعتذار له عما بدر منه خلال الفترة الماضية قائلاً “أكبر غلطة عملتها في حياتي اني سمعت كلام الناس، كنت مخلص من قلبي لكن شفت منهم عكس كدا، وربنا يكفيكم شر اللعب في الودن والكلام الفارغ، ربنا يبعد عنكم أي حد بيستغلكم ويضحك عليكم باسم الدين، ربنا يبعد عنكم أي حد عامل فيها مولانا وهو … صدقوني في حاجات مش هقدر أشرحها ليكم”.
واستكمل “ومش هقدر أقول غير اني اتسرعت وغلطت في هاني محروس غلط كبير بسبب اني اديت ودني للناس وسيبتهم يتكلموا ويولعوا براحتهم، اوعى تسلم ودنك لحد وتخليه يبخ فيها سموم، ده درس اتعلمته حبيت أوضحه علشان محدش يقع في نفس غلطتي”.
كما قام “خالد” بنشر فيديو نفي خلاله سرقة حسابه قائلاً “أنا خالد الفايد وحسابي مش مسروق ومن حق أي واحد في الدنيا يعمل الحاجة اللي بيحبها ومن حقه ينام ويقوم مرتاح نفسياً مش واكل حق حد، مش مضايق حد كل واحد من حقه يعمل اللي هو عايزه طالما ما بيأذيش حد، ليه المغالاة وليه الواحد يكبت على نفسه وليه الواحد يضيق على نفسه جامد خليها على الله”.
ووجه نصيحة لمتابعيه قائلاً “مش عيب انك تعتذر اعتذر أما تحس بالحزن انك كنت السبب في ألم شخص من دون ما تقصد، اعتذر اما تحس بالضيقة إنك أهملت شخص كان يستاهل اهتمامك، اعتذر اما تحس بالندم انك خسرت عاطفة شخص ما ناحيتك بسبب حاجة غلط انت عملتها، الاعتذار علاج، الاعتذار بس هو اللي قادر يصلح كل ده وأكتر.. اعتذار بدون أعذار”.
وكان المنتج هاني محروس، أعلن في نوفمبر 2022، تعاقده مع المطرب خالد الفايد، على تقديم ألبوما يضم 8 أغاني، وطرح منها أغنية بعنوان “أنا حد جديد” وفي فبراير 2023، أعلن المطرب خالد الفايد، اعتزاله الغناء، وظهر باللحية ومرتديا الجلباب.
وقد أعلن المطرب خالد الفايد اعتزاله الغناء مطلع العام الجاري وقام بتغيير صورة حسابه على “فيسبوك” وظهر فيها مرتدياً جلباباً أبيض معلقاً “اللهم اجعل توبتي وعملي خالصاً لوجهك الكريم وبعتذر مش هرد على أي حد”.
