12:44 ص
الأربعاء 24 مايو 2023
كتب مروان الطيب:
فاجأ النجم تامر حسني هالة عمر منسقة أعماله بحضور حفل زفافها، ونشر صور من حفل الزفاف على حسابه الرسمي “إنستجرام”
وعلق قائلاً: “لكل اللي بيسأل عن إيه وجه القرابة بيني وبين العروسة الجميله دي شايف أسألة كتير أنا هحكيلكوا هي اسمها هالة عمر عرفتها كانت بنت من الفانز صغيرة ومن المقاتلين والمدافعين عن تامر على الانترنت، ومن كتر دفاعها عني لفتت نظري و مرة رديت عليها شكرتها و لما سافرت اسكندرية في الوقت ده لقيت بنت صغيرة اوي بتعيط وبتجري عليا فوقفت لها وفكرتني بنفسها وفضلت تعيط وتقولي إحنا معاك ولازم تكمل عشان كنت بتحارب جداً في بداياتي فاتصدمت إن اللي بتقول كده بنت صغيرة كده والمجهود ده كله اللي عاملاه بنت صغيرة عندها ١٤ سنه وقتها”
واستكمل: “كانت السوشيال ميديا لسه بتطلع وكنا في شركتنا بندور على شركة كبيرة تمسكلي السوشيال ميديا لحد ما قلتلهم أنا مش عايز شركة كبيرة أنا عايز البنت الصغيرة دي هي اللي تمسكها فضلوا يقنعوني إن كده مش صح ولازم أكتر حد خبرة يمسكها وأنا قولت لا لازم اكتر حد بيحبني هو اللي يمسكها وأنا واثق إن طاقة الحب مفعولها أقوى من طاقة المحترف بلا حب فعرضت عليها تشتغل معايا وهي في السن ده مصدقتش طبعاً ومن ساعتها وهي اللي ماسكه كل شغل الميديا الطفلة الشاطرة اللي كبرت دلوقتى قدامكم هالة عمر”
وعن زوجها قال: “أما بقى عريسها العسل ده اسمه عمرو طلب إديها مني أنا عشان والدها ووالدتها توفاهم الله في سنة واحدة رحمهم الله ياريت نفتكرهم ونهدي لهم ثواب الدعاء والفاتحة”.
وتابع: ” ومن اللحظة دي اتحولت هالة لبنتي الكبيرة بجد اللي بتتجوز دلوقتي قدامي وبسلمها لعريسها بنفسي وبغني في فرحها، معرفتش أرد على كلامك عني في الفرح يا هالة رديت دلوقتي هنا ربنا يكرمك ويسعدك مع جوزك الجميل المحترم اللي هيكون ضهرك وسندك ويكمل معاكي مشوار حياتك مع أولادكم الجُمال بإذن الله”.
وجاء رد تامر على “هالة” والتي وجهت له الشكر والتحية على وقوفه بجانبها طيلة السنين الماضية وعن تقديرها له ووصفته بـ “أبويا” اللي مقدرش يكون موجود في الفرح لتنهمر في البكاء
ويذكر أن تامر حسني أعلن مؤخراً عن انضمام الفنانة دينا الشربيني لأحدث أعماله السينمائية هذا العام وهو فيلم “تاج” وهو أول سلسلة للأبطال الخارقين فى السينما المصرية والمقرر عرضه خلال العام الجاري
