07:26 م
الأحد 18 يونيو 2023
بعد أن أعلنت الفنانة ميرهان حسين اعتزالها وابتعادها عن السوشيال ميديا والفن فاجئت جمهورها بفيديو توضح به ما التي كانت تقصده.
ونشرت الفيديو عبر صفحتها على موقع التواصل الإجتماعي “انستجرام” وقالت: “أولا وحشتوني جدا وأسفة بجد إني اختفيت عليكوا الفترة دي .. أنا اختفيت عنكم عشان كنت عايزة أرجع أحسن من الأول وكنت محتاجة فترة بس إني أبقى فيها أحسن .. بجد مش عارفة أشكركوا إزاي على كلامكم واهتمامكم وعلى حبكوا ليا اللي أنا شوفته جدا الفترة دي”.
ووجهت رسالة شكر قائلة: “عايزة أقول شكرا لكل أصحابي وزمايلي والناس اللي بتحبني اللي أنا فعلا لولاهم مكنتش هعرف أعدي الأيام اللي فاتت دي اللي مكنتش فيها في أحسن حالاتي خالص وبوقفتكوا جنبي ودعمكم ليا رجعت أحسن وإن شاء الله الأيام اللي جاية تكون الأحلى في حياتي”.
وأضافت: “وبخصوص موضوع اعتزالي أنا مكنتش بقصد إني بعتزل الفن أنا كنت أقصد إني بعتزل السوشيال ميديا بعتزل الناس لفترة بس عشان أنا كان عندي إحباط زي ما أي بني أدم ممكن يعدي بفترات إحباط أو إكتئاب في حياته وبوقفة الناس اللي بتحبني جنبي هقدر أعدي الوقت الصعب ده فأنا إن شاء الله قادرة أعدي وقادرة أبقى أحسن وبوعدكوا إن شاء الله الفترة الجاية بحاجات حلوة ومريهان اللي بتحبوها بجد شكرا”.
وعلقت على الفيديو وكتبت: “شكرًا على الحب والدعم اللي فرح قلبي وعرفني إن حبكم نعمة من ربنا، شكرًا لكل حد منكم بعتلي مسدچ أو حاول يوصلي و يعبرلي عن حب جميل و يحسسني إني متعبتش عالفاضي شكرًا لكل اللي قالوا في حقي كلمة حلوة .. إن شاء الله هارجع أكون معاكم وربنا يكتب الخير ليا ولكل الناس ،، شكرًا مرة تانية من قلبي”.
وكانت قد فاجئت الفنانة ميرهان حسين جمهورها ومتابعيها بقرار اعتزالها وابتعادها عن السوشيال ميديا وأوضحت السبب وراء منشورها قائلة “بعد ما قدمت العديد من الأدوار التي لا تشبهني ولا تشبه موهبتي ولا تستغل أدواتي كفنانة ممثلة محترفة وحصلت على العديد من ورش التمثيل وأملك القدرة على التقليد بالأداء والصوت والشكل و الهيئة والملامح التي أجيد رسمها على وجهي بالمكياج والشعر دون مساعدة من أحد وبنفسي فقط و بأبسط الامكانيات”.
وأنهت تعليقها “وسط مصالح وشللية و موضة ومين متجوز مين ومين مصاحب مين مش مين شاطر وموهوب”.
وكانت قد كشفت “ميرهان” عن ابتعادها عن السوشيال ميديا في بداية الأمر قائلة “اجازة مفتوحة من الـ سوشيال ميديا والمكالمات والالتزامات والمجاملات والتواجد من أجل الاخرين مش هكون موجودة ولا عايزة حاجة من حد ولا حد يعوز مني حاجة واللى زمان أنا عيشته لغيري أنا دلوقتي هعيشه لنفسى، لا عايزة تقدير لا في شغل ولا في حياة ولا صحاب ولا حبايب ولا معارف ولا حاجة تستاهل ولا حد يستاهل اللي بيحبوني شكراً وكتر خيركم واللي مابيحبونيش شيلوني من حساباتكم لحد ماقدر أواجه الحياة الظالمة دي تاني سلام، تعبت وأشعر بعدم التقدير لشخصي ولموهبتي ولم اعتد البقاء في مكان ومع أشخاص لا تقدرني تعبت لذلك اعتزل”.
