بسمة وهبه تهاجم مادلين طبر على الهواء بسبب الزعيم: هقدم فيكي

11:08 م


الثلاثاء 15 أغسطس 2023

كتب مروان الطيب:

علقت الإعلامية بسمة وهبة على التصريحات المنسوبة للفنانة اللبنانية مادلين طبر بأحد المواقع خلال إحدى فقرات برنامجها “90 دقيقة” على قناة المحور، والتي عبرت خلاله عن إنزعاجها من عدم حضور الزعيم عادل إمام تكريم المهرجان القومي للمسرح وذلك نظراً لكون الدورة الماضية حملت اسمه

وتطرقت “وهبة” في حديثها عن الطريقة التي تحدثت بها “طبر” حيث أنها طالبت عائلة الزعيم عادل إمام الإفراج عنه وعن كونهم السبب في عدم تكريمه كما وجهت التحية لمن اقتحموا منزله خلال الفترة الماضية وقاموا بالاحتفال بعيد ميلاده على حد قولها.

لتهاجمها بسمة وهبة قائلة: “النهاردة شوفت بوست مضايقني جداً جداً ومعصبني جداً جداً الفنانة مادلين طبر قالت إن أمنيتها عائلة عادل إمام تفرج عنه ويحضر تكريمه في المهرجان القومي للمسرح وكنا هنستقبله برموش عينيا ورامي ابنه مابيردش خالص، طب ازاي نطمن عليه؟، لازم نقتحم الفيلا والناس اللي اقتحموا بيته وعرفوا يعملوا له عيد ميلاد برافو عليهم وده المهم”.

واستكملت: “يعني الحقيقة ده كلام صادم جداً لا يليق بمكانة فنانة وهي بكلامها ده بتسيء للفن لأنها محسوبة على الفن وتعالوا أقولكم إيه اللي ضايقني وهي سقطاتها في إيه؟، إيه تفرج عنه دي مين قالك إنهم مكتفينه جبتي الكلام ده منين، إنتي واعية للكلام ده، إنتي واعية انتي بتتكلمي عن مين إنتي بتتكلمي عن الزعيم، يحضر المهرجان ولا ميحضرش إنتي إيه دخلك، ورامي ابنه مبيردش عليكي يرد عليكي ليه هو انتوا صحاب هو انتي جيل الزعيم اصلا”.

مضيفة: “وبعدين إزاي نطمن عليه؟، محسساني إن إنتي بنت خالته، واطمنا عليه كلنا وجمهوره اطمن عليه لما عمل مداخلة وخلاص طيب”، أما عن جملة اقتحامها فيلا الزعيم علقت قائلة: “إنتي عارفة إن الجملة دي ممكن تتحاسبي عليها قانوناً إنتي بتعملي دعوة لاقتحام منزل الزعيم عادل إمام هو إنتي فاكرة نفسك رايحة تقتحمي إيه عشة فراخ، ده الزعيم عادل إمام يا ست مادلين طبر، وأنا هقدم فيكي بلاغ دلوقتي إنك بتقولي نروح نقتحم الفيلا دي دعوة غير قانونية بالمرة”.

وأنهت حديثها قائلة: “حضرتك عرفتي منين إنهم اقتحموا بيته، وبعدين عملوله مفاجأة إنتي إيه عرفك هم إيه بالنسبة له، انتي لازم تفهمي لا من جيله ولا من صحابه ولا من معارفه مافيش أي حاجة وبعدين انتي بتتلكمي عن الفنانة يسرا والفنانة لبلبة عشرة عمره ولما يعملوا كده هما أصدقائه إنتي حاشرة نفسك ليه انتي مش في نفس المكانة”.