02:05 م
الأربعاء 20 سبتمبر 2023
كتبت نوران أسامة:
تحدث الفنان فادي خفاجة، في مكالمة هاتفية مع الإعلامي تامر أمين بـ برنامج “آخر النهار” المذاع على قناة النهار، عن أزمته الأخيرة على “تيك توك”
وعبر فادي، عن إستياءه وندمه بسبب البث المباشر الذي قدمه عبر حسابه الرسمي بموقع الفيديوهات “تيك توك”.
وقال فادي، خلال المكالمة الهاتفية: “مش قادر أقول حاجة غير إني كنت في لحظة ضعف، وبرضو أي بني آدم على وجه الأرض زي ما هو شايفني فنان، أنا إنسان قبل ما أكون فنان”.
واستكمل: “أنا لو رجع بيا الوقت ممكن معملش ده تاني وأنا مش عارف أنا عملته إزاي، من الضغوطات ومن اليأس، ومن حالة سعي كبيرة موصلتش بيها لحاجة”.
وتابع فادي: “أنا لا حصلت فنان ولا إنسان طبيعي وأنا لو سبت الناس في حالي وقعدت لوحدي أنا معنديش إجابات وأنا بتسأل السؤال ده في اليوم مليون مرة”.
وأضاف: “أنا كل الأساتذة الكبيرة اللي اشتغلت معاها، محمد صبحي، يحيى الفخراني، نور الشريف، وعاطف الطيب، كلهم طول الوقت دايما كانوا بيشكروا فيا وده اداني أمل، شهادة الأساتذة الكبار دي كانت رسالة من ربنا في إني أقدم في معهد الفنون المسرحية، واجتهدت وتخرجت بتقدير كل ده راح فين ولما تواجدت في مسلسل زي الاختيار كنت ضيف شرف وده كان شرف ليا وانتظرت أن أبواب ربنا تتفتح”.
واستكمل فادي حديثه: “وبعد كل ده مفيش وأنا مش عارف أنا مابشتغلش ليه وأتحدى أن مخرج يقول إني أنا مبجيش في ميعادي، أو منتج يقول إني ناقشته في الأجر محصلش، سعيت وروحت قابلت مخرجين بدون استدعاء وزمان كنا بنعرف نقابل المخرج دلوقتي لازم تبعت على الإيميل وتاخد ميعاد وحتى لو النظام ده كويس بس أنا مش عارف أتواصل معاه لأن وسط كل اللي بيتقدم أنا مش هظهر”.
واختتم فادي حديثه قائلًا: “أعز الزملاء ومواهب أكبر مني كلنا بنكلم بعض وبنسأل ليه مش بنشتغل لكن أنا بعتذر ومكنش ينفع اللي أنا عملته لكن أنا حصل معايا حاجتين أنا جاتلي رسايل من أمام الكعبة ناس معرفهاش بتدعيلي وناس أخدت الفيديوهات وقطعتها وأنا مكنتش متخيل أن ناس تعمل كده”.
وظهر الفنان فادي خفاجة، خلال الساعات الماضية بفيديو على “تيك توك” منهارا بسبب قلة مشاركته في الأعمال الفنية.
يذكر أن “فادي” جسد شخصية واحد من أبناء سيناء في مسلسل “الاختيار” بطولة أمير كرارة، أحمد العوضي، دينا فؤاد، وعدد كبير من الفنانين.
