11:59 م
الإثنين 11 سبتمبر 2023
كتب مروان الطيب:
كشفت الفنانة هاجر الشرنوبي عن تعرضها للسرقة، وذلك عبر منشور شاركته مع متابعي حسابها الرسمي على موقع فيسبوك.
وأوضحت “هاجر” تعرضها للسرقة من قِبل سيدة كانت تأتي لتساعدها في أمور البيت، وكتبت: “أنا في اختبار صعب، وعمالة أسأل كل اللي حواليه أعمل إيه؟، الست اللي بتساعدني في البيت سرقتني شكيت فيها آه بس مكنتش متأكدة، ومحبتش أظلم ولا ابلغ، قلت أنا مش هجيبها البيت تاني وخلاص، كلمتني كذا مرة مردتش، سابتلي ڤويس وصوتها كان تقيل صوت حد عنده جلطة، ـنا اتجننت إني ظلمتها ووصلت للحالة دي”.
واستكملت: “كلمتها مالك يا بنتي في إيه؟، قالتلي ابني كان مأجر موتوسيكل اتسرق منه والراجل شراني عاوز فلوس، عاوز كام كذا، المهم كلمت الناس اللي كانت بتساعدهم كلهم في البيت ولمينا فلوس، أقسم بالله مش معايا أساسا وروحتلها البيت، بس حسيت إنها تمام وبكامل صحتها، هي بس متقلة في صوتها مش اكتر، قلت دي حاجة لربنا وخلاص وحسبي الله ونعم الوكيل فيها لو كل ده فيلم، سافرت بعدها بعشر ايام لقيت ظابط بيكلمني وبيقولي ان الست دي ظبطوها وهي بتبيع فردة الحلق بتاعي ومع الضغط عليها اعترفت انها سرقتني وأنها كانت بتمثل عليا انها اتجلطت”.
وتابعت: “ما بين سين وجيم في التليفون، قلت للظابط بس أنا متنازلة ومش هينفع تتسجن علشان هيا عندها أولاد صغيرين (العفو عند المقدرة) وبنتها الصغيرة كانت بتيجي معاها، و،نا كنت متعلقة بيها عاطفيا جدا، هيا زئرده كده عندها ٩ سنين بس بحبها اوي كلمتني وقالت لي والنبي يا طنط انا مش هعرف اعيش من غير ماما، ماما مسكوها وهي بتبيع الحلق بتاعك وفجأة الخط قطع، أنا مش عارفة البنت الصغيرة عارفه حقيقة والدتها ولا لأ ؟ ودي بالنسبالي بجد قصة تانية أسوأ من كل الموضوع ده”.
مضيفة: “اتضح إني لازم بنفسي أروح القسم اتنازل، ومن حظها الوحش اني كنت مسافرة واتاخرت عليها ولما رجعت من السفر روحت في اليوم الخامس اللي اتجددلها فيه الحبس، تفاجأت وأنا في النيابة إن خلاص ميعاد جلستها بسرعة بعد بكره والحظ السيء اني مسافرة برضه بس قررت أعمل توكيل لمحامي، كلمت الناس اللي كانو جيبينهالي والناس دي كلمت كل الناس اللي كانت بتروحلهم في الكومباوند اكتشفنا كمية سرقة ونقل كلام لا تعد ولا تحصي”.
وأنهت حديثها قائلة: “أنا ليه بحكي كل ده ؟، في حاجة كده رنت في ودني إني أكلم دار الأفتاء، كلمتهم قالولي اني لو روحت وقولت إنها مسرقتنيش تبقى شهادة زور، ولو قولت انها سرقتني بس أنا مسامحاها كده هيبقي تنازل عن شق مدني وهيبقي لسه فيه شق جنائي وهيتحكم عليها، إيه العمل ؟ أتصرف أزاي، انا بجد صعبان عليا الأولاد الصغيرين أوي، وفي نفس الوقت أكيد مش هشهد زور، اتصرف إزاي ؟؟؟؟، أنا عاوزة قرار يريح قلبي وضميري في نفس الوقت”.
هاجر الشرنوبي شاركت قبل رمضان في مسلسل “وبينا ميعاد”، إخراج هاني كمال، وبطولة شيرين رضا، صبري فواز، مدحت صالح، وفاء صادق، محمد سليمان، بسمة، عايدة فهمي، داليا شوقي وأسامة الهادي وخالد أنور وآية سليم ويوسف إبراهيم وتسنيم مطر ويوسف الكدواني وميران عبدالوارث وكنزي رماح ومحمد العزازي.
